நடராஜனுக்கான வரவேற்பைப் பார்த்து சேவாக் பிரமிப்பு

நடராஜனுக்கு அளிக்கப்பட்ட வரவேற்பு



இந்திய அணியில் இடம் பெற்று ஆஸ்திரேலியாவில் கலக்கிய தமிழக வீரர் நடராஜன் நேற்று சேலத்தில் உள்ள சின்னப்பம்பட்டிக்கு திரும்பியபோது அளிக்கப்பட்ட வரவேற்பைப் பார்த்து, முன்னாள் வீரர் வீரேந்திர சேவாக் பாராட்டியுள்ளார்.

இந்திய அணியில் வலைப்பயிற்சி பந்துவீச்சாளராக இடம் பெற்ற தமிழக வீரர் நடராஜன் ஒருநாள், டி20 மற்றும் டெஸ்ட் போட்டியில் இடம் பெற்று தனிமுத்திரை பதித்தார்.

இந்திய அணியில் பலவீரர்கள் ஆஸ்திரேலியத் தொடரில் சிறப்பாகச் செயல்பட்டிருந்தாலும், நடராஜனின் பங்களிப்பு குறித்து பெருமையாகவே பேசப்பட்டு வருகிறது.

ஆஸ்திரேலியாவுக்கு எதிராக பிரிஸ்பேன் டெஸ்ட் போட்டியில் அறிமுகமாகிய நடராஜன் 3 விக்கெட்டுகளை வீழ்த்தி திருப்பத்தை ஏற்படுத்தினார். காபா மைதானத்தில் 32 ஆண்டுகளாக தோல்வியைச் சந்திக்காத ஆஸ்திரேலிய அணியை 3 விக்கெட் வித்தியாசத்தில் வீழ்த்திய இந்திய அணி பார்டர்-கவாஸ்கர் கோப்பையை 2-வது முறையாகக் கைப்பற்றினர்.

இந்திய அணியினர் ஆஸ்திரேலியப் பயணத்தை முடித்துக்கொண்டு நேற்று தாயகம் திரும்பினர். இதில் தமிழக வீரர் நடராஜன் சேலம் சின்னப்பம்பட்டிக்கு நேற்று மாலை வந்தார். நடராஜனுக்கு சொந்த ஊர் மக்கள், ரசிகர்கள், கிரிக்கெட் ரசிகர்கள் அனைவரும் உற்சாக வரவேற்பு அளித்தனர்.

நடராஜனுக்கு அளிக்கப்பட்ட வரவேற்பு, அவரை மக்கள் ஊர்வலமாக அழைத்து வந்த காட்சிகளை காணொலி மூலம் இந்திய அணியின் முன்னாள் கேப்டன் வீரேந்திர சேவாக் பார்த்து பிரமித்தார்.

நடராஜனுக்கு அளிக்கப்பட்ட வரவேற்பு குறித்த வீடியோவை தனது ட்விட்டர் பக்கத்தில் சேவாக் பகிர்ந்து பாராட்டியுள்ளார்.
அதில் “ இதுதான் இந்தியா. இங்கு கிரிக்கெட் என்பது சாதாரண விளையாட்டு அல்ல. அதற்கும் மேல், அதிகமாகப் பார்க்கப்படுகிறது. சேலம் மாவட்டம், சின்னப்பம்பட்டியில் உள்ள சொந்த ஊருக்கு நடராஜன் வந்தபோது அவருக்கு மிகப்பெரிய வரவேற்பு அளிக்கப்பட்டது. நம்ம முடியாத வகையில் இருக்கிறது” எனத் தெரிவித்தார்.