லண்டன், ஜூலை 9, 2025 — முன்னாள் இங்கிலாந்து பிரதமர் ரிஷி சுனக், கோல்ட்மேன் சாக்ஸ் என்ற முதலீட்டு வங்கியில் மூத்த ஆலோசகராக புதிய பதவியை ஏற்றுள்ளார். 20 ஆண்டுகளுக்கு முன்பு அவர் இந்த வங்கியில் தனது வாழ்க்கையை தொடங்கினார். செவ்வாய்க்கிழமை வெளியான இந்த அறிவிப்பு, இங்கிலாந்தின் நெறிமுறைகள் கண்காணிப்பு அமைப்பின் கவனத்தை ஈர்த்துள்ளது. சுனக் அரசியலில் இருந்தபோது பெற்ற செல்வாக்கு, இந்த பதவியில் முரண்பாடுகளை ஏற்படுத்தலாம் என்று அவர்கள் கவலை தெரிவித்துள்ளனர்.
2022 அக்டோபர் முதல் 2024 ஜூலை வரை பிரதமராக பணியாற்றிய சுனக், உலகப் பொருளாதாரம் மற்றும் அரசியல் பிரச்னைகள் குறித்து கோல்ட்மேன் சாக்ஸ் வாடிக்கையாளர்களுக்கு ஆலோசனை வழங்குவார். அதேநேரம், ரிச்மண்ட் மற்றும் நார்தாலர்டனின் நாடாளுமன்ற உறுப்பினராக (MP) தொடர்ந்து பணியாற்றுவார். இந்த பதவியில் இருந்து கிடைக்கும் முழு சம்பளத்தையும், தனது மனைவி அக்ஷதா மூர்த்தியுடன் இணைந்து தொடங்கிய ரிச்மண்ட் திட்டம் என்ற தொண்டு நிறுவனத்துக்கு நன்கொடையாக அளிப்பதாக உறுதியளித்துள்ளார். இந்த அமைப்பு இங்கிலாந்தில் கணிதத் திறனை மேம்படுத்த உதவுகிறது.
முன்னாள் அமைச்சர்களின் பதவிக்கு பிந்தைய வேலைகளை கண்காணிக்கும் இங்கிலாந்தின் வணிக நியமனங்களுக்கான ஆலோசனைக் குழு (Acoba), சுனக்கின் பதவியை அனுமதித்தாலும், கடுமையான நிபந்தனைகளை விதித்துள்ளது. 2026 ஜூலை வரை, இரண்டு ஆண்டுகளுக்கு இங்கிலாந்து அரசாங்கத்துடன் தொடர்பு கொள்ளவோ அல்லது பிரதமராக இருந்தபோது பெற்ற தகவல்களை பயன்படுத்தவோ அவருக்கு தடை விதிக்கப்பட்டுள்ளது. சுனக்கின் பதவி, கோல்ட்மேன் சாக்ஸுக்கு அரசியல் தகவல்களை அணுகும் வாய்ப்பை அளிக்கலாம் என்று Acoba கவலை தெரிவித்தது. இது அரசியல் மற்றும் நிதித்துறை இடையே உள்ள “சுழல் கதவு” (revolving door) பிரச்னையை மீண்டும் வெளிச்சத்துக்கு கொண்டு வந்துள்ளது.
கோல்ட்மேன் சாக்ஸ் தலைமை நிர்வாகி டேவிட் சாலமன், சுனக்கின் வரவை வரவேற்று, “ரிஷி மீண்டும் வந்து உலகளாவிய நிலைமைகள் குறித்த தனது தனித்துவமான கருத்துகளை பகிர்ந்து கொள்வது மகிழ்ச்சி அளிக்கிறது” என்று கூறினார். சுனக் 2001 முதல் 2004 வரை இந்த வங்கியில் பயிற்சியாளராகவும், இளநிலை ஆய்வாளராகவும் பணியாற்றியிருந்தார்.
இந்த முடிவு கலவையான கருத்துகளை ஏற்படுத்தியுள்ளது. சிலர் சுனக்கின் அனுபவத்தையும், தொண்டு நிறுவனத்துக்கு நிதியளிக்கும் முடிவையும் பாராட்டுகின்று, மற்றவர்கள், முன்னாள் பிரதமர் ஒருவர் பதவி விலகிய உடனே பெரிய நிதி நிறுவனத்தில் பணியாறுவது நெறிமுறை ரீதியாக சரியா என்று கேளி எழுப்பியுள்ளனர். X தளத்தில், சுனக்கின் மாமனார், இன்ஃபோசிஸ் நிறுவனர் நாராயண மூர்த்தி பரிந்துரைத்த 70 மணி நேர வேலை முறையை சுனக் பின்பற்றுவாரா என்று சிலர் நகைச்சுவையாக கருத்து தெரிவித்தனர்.
2024 ஜூலை தேர்தலில் கன்சர்வேடிவ் கட்சி பெரிய தோல்வி அடைந்ததை அடுத்து சுனக் பிரதமர் பதவியை இழந்தார். கட்சித் தலைமையில் இருந்து விலகிய அவர், நாடாளுமன்ற உறுப்பினராக தொடர்ந்து, ஆக்ஸ்ஃபோர்டு மற்றும் ஸ்டான்ஃபோர்ட் பல்கலைக்கழகங்களில் கல்விப் பணிகளையும் ஏற்றுள்ளார்.
முன்னாள் அரசியல்வாதிகள் தனியார் துறையில் பணியாறுவது குறித்து இங்கிலாந்தின் நெறிமுறைகள் விதிகளை மேலும் வலுப்படுத்த வேண்டும் என்று விமர்சகர்கள் வாதிடுகின்றனர். தற்போது, சுனக்கின் கோல்ட்மேன் சாக்ஸ் பயணம், அவரது நிதி மற்றும் அரசியல் அனுபவத்தை இணைக்கும் புதிய அத்தியாயமாக உள்ளது.
