ராஜீவ்காந்தி மருத்துவமனையில், கஞ்சா விற்க வந்தவர் சிக்கினார்..!

ராஜீவ்காந்தி அரசு மருத்துவமனையில் கஞ்சா விற்க வந்த ஆந்திரா வாலிபர் சிக்கினார். கைமாற்றும் முயற்சியின்போது, அவர் பிடிப்பட்டார்.

சென்னை ராஜீவ்காந்தி அரசு பொதுமருத்துவமனையின் உள்ளே வெள்ளிக்கிழமை அன்று இரவு வாலிபர் ஒருவர், கையில் பையுடன் அங்கும், இங்குமாக சந்தேகத்துக்குரிய வகையில் நடந்துக் கொண்டிருந்தார்.

இதைப் பார்த்து, அங்கு பணியில் இருந்த செவிலியர் ஒருவர் சந்தேகமடைந்து, அங்கிருந்து காவலாளிக்கு தகவல் தெரிவித்தார்.

உடனே மருத்துவமனை காவலாளிகள், அந்த நபரை பிடித்து விசாரித்தனர். ஆனால் அவர் தெலுங்கில் முன்னுக்கு பின் முரணாக பேசினார்.

இதையடுத்து அவர் வைத்திருந்த கைப்பையை காவலாளிகள் வாங்கி பார்த்த போது, அதில் கஞ்சா பொட்டலங்கள் இருந்ததை பார்த்து அதிர்ச்சியடைந்தனர்.

இதையடுத்து அவர்கள், அந்த நபரை கஞ்சாவுடன் மருத்துவமனை புறக்காவல் நிலையத்தில் ஒப்படைத்தனர்.

போலீசார் நடத்திய விசாரணையில் அவர், ஆந்திர மாநிலம் விசாகப்பட்டினத்தை சேர்ந்த கண்ணம்மநாயுடு (39) என தெரிந்தது.

ஆந்திராவில்  இருந்து ரயில் மூலம் 5 கிலோ கஞ்சாவை கடத்தி வந்துள்ளார். இங்குள்ள ஒரு கஞ்சா வியாபாரி, கூட்டம் அதிகம் உள்ள ராஜீவ் காந்தி மருத்துவமனைக்கு அழைத்துள்ளார்.  

ஆனால் கஞ்சா வியாபாரி வருவதற்கு தாமதமானதால், கண்ணம்மநாயுடு,   காவலாளிகளிடம் சிக்கிக் கொண்டார்.

இது தொடர்பாக பூக்கடை போலீசார் வழக்குப் பதிவு செய்து, கண்ணம்மநாயுடுவை கைது செய்தனர்.

ராஜீவ்காந்தி மருத்துவமனைக்குள், கஞ்சா கைமாற இருந்த சம்பவம், போலீசாரை அதிர்ச்சியடைய வைத்தது.